“Mədəniyyət sahəsindəki insanların əməkhaqqısı yüksək deyil”

Leyla Aliyeva 17/09/2020

Milli Məclisin Mədəniyyət komitəsinin bu gün keçirilən iclasında mədəniyyət naziri səlahiyyətlərini icra edən Anar Kərimov da iştirak edib.

“XəbərBuro"nun Qafqazinfo-ya istinadən verdiyi xəbərə görə iclasda çıxış edən A. Kərimov bildirib ki, 2 aydır birinci müavin və nazir əvəzi kimi fəaliyyət göstərir: “Bildirim ki, mədəniyyət sahəsi strateji bir istiqamətdir. Prezidentin tapşırğı ondan ibarətdir ki, bu istiqamətdə fəaliyyətimizi gücləndirək. Yeni strategiya hazırlanmalı və bu bizim üçün yol xəritəsi olmalıdır. Biz islahat işçi qrupu təsis etmişik. Bu qrupa yerli və xarici ekspertlər dəvət edilib. 

Prosesi daha da ictimailəşdirmək məqsədilə çağırış elan etdik. Bu çağırışlar şəffaflığın artırılması, iqtisadi modellərin tətbiq edilməsi ilə bağlı idi. 2 ay müddətində 200-dən çox rəy və təklif almışıq. Hamı gözləyir ki, biz bu sahəyə hansısa yeniliklər gətirək. 

Həm mərkəzi aparatda, həm də tabe olan müəssisələrdəki sahələrlə yox, daha çox müəssisələrlə məşğul olunmalıdır deyə fikir var idi. Bu kökündən yanlış yanaşmadır. Bizim missiyamız ondan ibarətdir ki, cəmiyyətin və fərdi insanların inkişafında rolumuzu artıraq. Bu zaman üzləşdiyimiz problemləri etiraf etməliyik. Hüquqi bazanın genişləndirilməsinə ehtiyac var. Bunun üçün də Mədəniyyət komitəsi bizə kömək olmalıdır. Sirr deyil ki mədəniyyət sahəsində çalışan insanların əməkhaqqısı yüksək deyil. Biz iqtisadi modellərin tətbiq edilməsini istəyirik. Digər məsələ şəffaflıq məsələdir ki, o da mütləq tətbiq olunmalıdır”.